អង់គ្លេស៖ រដ្ឋមន្ត្រីក្រសួងអប់រំ យុវជន និងកីឡា តំណាងកម្ពុជា ទទួលបាន «ពានរង្វាន់អក្ខរកម្មពិភពលោកឆ្នាំ ២០២៣ -World Literacy Award 2023» ពីមូលនិធិអក្ខរកម្មពិភពលោក នាកិច្ចប្រជុំកំពូលអក្ខរកម្មពិភពលោក នៅថ្ងៃទី០៤ ខែមេសា ឆ្នាំ២០២៣ នៅសាកលវិទ្យាល័យអុកហ្វឺត (Oxford) ប្រទេសអង់គ្លេស។

ពានរង្វាន់អក្ខរកម្មពិភពលោកឆ្នាំ២០២៣ ត្រូវបានប្រគល់កម្ពុជា ដោយមើលឃើញថា កម្ពុជាជាប្រទេសដែលមានភាពលេចធ្លោក្នុងការដាក់ចេញគោលនយោបាយ និងការលើកកម្ពស់ការរៀនសូត្រអក្ខរកម្ម និងលើកកម្ពស់ផ្នែកអប់រំ។

ក្រសួងអប់រំ យុវជន និងកីឡា ចាត់ទុកថា ពានរង្វាន់ដែលទទួលបាននេះ ជាភាពជោគជ័យសម្រាប់បុគ្គលិកអប់រំទាំងអស់ និងសម្រាប់វិស័យអប់រំទាំងមូល។ បើតាមក្រសួងអប់រំ ពានរង្វាន់នេះបានឆ្លុះបញ្ចាំងឱ្យឃើញពីផលវិជ្ជមាន ក្នុងការអនុវត្តកម្មវិធីកំណែទម្រង់អប់រំ ដែលក្រសួងអប់រំ យុវជន និងកីឡាបានដាក់ចេញកន្លងមក ក្នុងការលើកកម្ពស់គុណភាពអប់រំ រួមទាំងការបណ្ដុះបណ្ដាល ពង្រឹងសមត្ថភាពគ្រូបង្រៀន និងសិស្សានុសិស្ស។

ក្រសួងអប់រំបានអរគុណដល់អ្នកពាក់ព័ន្ធទាំងអស់ ដែលបានចូលរួមចំណែកក្នុងការកសាងប្រព័ន្ធអប់រំកម្ពុជា ពីចំណុចសូន្យចាប់តាំងពីជាង ៤០ឆ្នាំមុន បន្ទាប់ពីរបបប្រល័យពូជសាសន៍ត្រូវបានបញ្ចប់។

គូសបញ្ជាក់ថា ពានរង្វាន់ World Literacy Foundation Award គឺជាគំនិតផ្តួចផ្តើមរបស់មូលនិធិអក្ខរកម្មពិភពលោក ដែលជាអង្គការសប្បុរសធម៌អក្ខរកម្មពិភពលោកកំពូល និងក្រុមប្រឹក្សាអក្ខរកម្មពិភពលោក៕